Каләм тибрәтүчеләр

10.01.2018

Бер уй


Уйларымны иләк аша сөзеп,
Бер киштәгә тездем тәртипләп.
Фикер җебем берсе адашты да,
Тынгы бирми, булмый бернишләп.

Бер уй җебем чуалып калды да,
Бутады сөрешен дөньямның.
Син сүрелеп сүнгән. Җавап эзлим.
Син янганмы? Ә мин? Кем янган?

Таяндым да уемның биленә,
Күзем йомып мирдән ваз кичтем.
Уем сөзентесе һаман уяу.
Ул янучы… Түгелдер ич мин?!

Уйлар учагында дөрләп янам,
Фикер дәфтәремдә нокта юк.
Адашканы тынгы бирми җанга,
Шул көйдерә. Сине уйлау — ут.

Айгөл Имамиева. Теләче районы


фото: pixabay.com