Журнал турында


“Казан утлары” — 1922 елда чыга башлап дистә еллар буена татарның төп журналы булган, милләт гамен чагылдырган саллы һәм данлы басма. Ул хәтта Бөек Ватан сугышы чорында да, СССРда күп кенә газета-журналлар ябылып торганда да чыгудан туктамаган. Кызык факт: аның кайбер нөсхәләрен, корал һәм азык-төлек белән бергә, дошман тылындагы сугышчыларыбызга парашют белән ташлаганнар.

Татар язучыларының иң яхшы романнары, повестьлары, хикәяләре әүвәл шушы журналда дөнья күрә. Биредә шулай ук пьесалар, күренекле шәхесләребезнең истәлекләре һәм көндәлек язмалары, театрыбыз һәм җыр сәнгатебез турындагы мәкаләләр, юмор-сатира әсәрләре басыла. Татар халкының тарихы, рухи мирасы һәм хәзерге хәле исә журналның төп, үзәк темасы булып тора.

“Казан утлары” 1922 елның май аеннан бирле татар телендә чыга.
1922-30нчы елларда “Безнең юл”, 1930-33нче елларда “Атака”, 1933-65нче елларда “Совет әдәбияты”, 1965нче елдан башлап “Казан утлары” исеме белән дөнья күрә.

1977 елның 17нче гыйнварында “Мактау билгесе” ордены белән бүләкләнә.
2006 елның февралендә “Казан утлары”журналы элекке СССРның әдәби журналлары арасында беренче булып 1000нче санын чыгарды.  Шул мең саннан иң шәп әсәрләрне сайлап, “Сүнмәс утлар балкышы” дигән, матбугатта бик югары бәя алган антология дә нәшер ителде.

Журнал “Бәллүр каләм – 2015” бәйгесендә дә махсус бүләккә лаек булды.

“Казан утлары” журналы “Многоликая Россия 2015” Бөтенроссия VIII ачык халыкара  журналистика конкурсының “Матбугат басмаларында патриотизм һәм туган якка мәхәббәт хисләре тәрбияләү турында язмалар сериясе” номинациясендә I урын, “Многоликая Россия 2016” Бөтенроссия IX ачык халыкара журналистика конкурсының “Матбугат басмаларында язмалар циклы” номинациясендә III урын алды.

Гамәлгә куючысы — “Татмедиа” АҖ.
Журналга Россия Федерациясенең барлык почта бүлекчәләрендә дә язылып була.