Уйлар уйнавы
***
Ирешмәде ул бернинди дәрәҗәгә -
Тыйнак иде җанбиздергеч дәрәҗәдә.
***
Елганың берьюлы ике ярында да басып тору мөмкин түгел. Йә бер ярында, йә аръягында гына тора аласың.
***
Ике мескен очрашса, һәрвакыт өченче мескенне мыскыл итеп сөйләшерләр.
***
Иң яраткан кешеңнең кимчелекләре күренми, диләр.
Шуңа күрәдер инде кеше үзенең бик күп кимчелекләрен күрми.
***
Ачуымны ачсам, ачуланма -
Ачмый калсам, тагы да ачылана.
***
Ул үз бәхетенең бәхетсезлеккә илтүен аңламаслык дәрәҗәдә үк бәхетле иде.
***
Начар кешеләр юк. Бары тик синең күңелеңә хуш килмәүчеләр генә бар.
Яхшы кешеләр дә юк. Фәкать синең күңелеңә хуш килгәннәре генә бар.
***
Бай кешене бай булганы өчен яратмыйлар.
Ярлы кешене ярлы булганы өчен яратмыйлар.
***
Йөзгә кызыллык килер өчен дә үз йөзең булу кирәк.
***
Гел дөрес сүз сөйләүче – дөрес кеше түгел.
***
“Үз дөньясы”н булдыра алмаган язучы гына “әдәбият дөньясы” дигән төшенчәне ярата һәм еш куллана.
***
Кырык ел элек килгән хатларда мин бүген шулкадәр күп яңалык табам... Үзем турында.
***
Саргаеп беткән иске фотолардан миңа шелтә катыш кызгану белән карыйлар шикелле.
***
Үзең булып калыр өчен, үзеңне табу кирәк.
***
Сүз иреге тел ирегеннән башка була алмый.
***
Аның күңеле коточкыч киң иде...
***
Кар яуганга оныгы куанганда, бабай кар яуганга түгел, оныгы шат булганга куана.
***
Яшәүнең чын мәгънәсен тапкан кеше белән очрашырга язмасын...
Кем белгән аның мәгънәне нидә тапканын...
***
Сине берәрсе мактаганда сөенергә ашыкма.
Иң элек үзеңә сорау куй: “Ник мактый икән бу мине?..”
***
Ап-ак күлмәк кер күтәрми,
Бер каралса, пакь ителми.
***
Акны карага буявы җиңел.
Караны ак итү авыр.
***
Затлы әйбер тутыкса да кыйммәт була.
Затлы кеше картайса да әйбәт була.