Балаларның якын дусты

Танылган язучы, журналист һәм рәссам, Татарстанның атказанган сәнгать эшлеклесе Дания Гайнетдинова 1952 елның 2 гыйнварында Теләче районының Олы Тиләҗи авылында дөньяга килгән. Казан дәүләт университетының журналистика факультетын тәмамлаганнан соң, хезмәт юлын 1975 елда Татарстан китап нәшриятында редактор булып эшләүдән башлый. Шул елларда республика матбугатында беренче иҗат тәҗрибәләре – шигырьләре, нәсерләре, рецензияләре басыла. 1984 елда Д.Гайнетдинова Татарстан язучылар берлеге каршындагы Әдәби фонд оешмасына эшкә күчә. Күренекле әдипләр белән аралашу, иҗат остаханәләре эшендә катнашу яшь каләмнең әдәби осталыгын һәм иҗат активлыгын үстерүгә уңай йогынты ясый.

Шулай да аның иҗат юлының иң зур өлеше Татарстан радиосы белән бәйләнгән. 1991 елда ул балалар һәм яшүсмерләр өчен тапшырулар редакциясенә өлкән мөхәррир булып килә һәм бик тиздән язмышына язылган бер эш булуын аңлап ала. Шул вакыттан бирле Дания ханым “Гөлбакча”, “Көмеш кыңгырау”, “Сердәшханә”, “Язучылар – балаларга”, “Табигать дуслары” тапшыруларының алыштыргысыз авторы һәм мөхәррире. Ул биредә радиодраматург буларак та ачылды, аның тарафыннан татар һәм чит ил авторларының әсәрләре буенча дистәләгән радиоспектакльләр эшләнде. 1995 елда балалар өчен иң яхшы радиопостановкаларга Россия күләмендә оештырылган конкурста җиңеп чыкты. Авторның “Яңа ел төнендә”, “Тылсым дөньясы”, “Әкият иленә сәяхәт” кебек эчтәлекләре белән мавыктыргыч та, маҗаралы да, тәрбияви дә радиоспектакльләре Татарстан радиосы фондында саклана.

Радиода эшләгән елларында Дания Гайнетдинова халык яратып кабул иткән җырлар авторы буларак та танылды. Журнал укучылар игътибарына аның шигырьләреннән һәм аларга иҗат ителгән җырлардан төзелгән радиокомпозиция тәкъдим итәбез. Ходай биргән гомернең һәр мизгеленнән тәм табып, саулыкта-сәламәтлектә иҗат итәргә язсын Сезгә, Дания ханым!

Реклама