ГАБДУЛЛА ТУКАЙ ИСЕМЕНДӘГЕ ПРЕМИЯЛӘР ТУРЫНДА КПССның ТАТАРСТАН ӨЛКӘ КОМИТЕТЫ БЮРОСЫ ҺӘМ ТАССР МИНИСТРЛАР СОВЕТЫ КАРАРЫ
КПССның Татарстан өлкә комитеты бюросы һәм ТАССР Министрлар Советы партиянең XXII съезды, КПСС Үзәк Комитетының Октябрь һәм аннан соңгы Пленумнары карарлары иҗади фикер өчен зур киңлекләр ачканлыгын, әдәбият һәм сәнгать үсеше өчен бай мөмкинлекләр тудырганлыгын билгеләп үтәләр.
Соңгы елларда республика язучыларының, композиторларының, художникларының һәм театр работникларының ижади эшчәнлеге шактый активлашты. Алар идея ягыннан өлгергән һәм художество ягыннан җитлеккән күп кенә әдәби, музыкаль, сынлы сәнгать һәм сәхнә әсәрләре тудырдылар. Хезмәт ияләре массаларының әдәбият һәм сәнгать белән кызыксынуы шактый артты, аларның рухи ихтыяҗлары киңәйде. Художество интеллигенциясенә һаман саен югарырак таләпләр куела бара.
1966 елның апрелендә татар әдәбиятына нигез салган Габдулла Тукайның тууына 80 ел тулу уңае белән һәм әдәбият һәм сәнгать өлкәсендә киләчәктә иҗади активлыкны тагын да күтәрү, аларда халыкчанлык һәм партиялелек, революцион гуманизм, совет патриотизмы һәм интернационализм принципларын һәрьяклап үстерү максаты белән КПССның Татарстан өлкә комитеты бюросы һәм ТАССР Министрлар Советы
КАРАР БИРӘЛӘР:
- Идея эчтәлеге һәм художество дәрәҗәсе аеруча әһәмиятле булган әдәбият, музыка, сынлы сәнгать әсәрләре һәм иң яхшы башкару эшчәнлеге өчен һәркайсы 1000 сум күләмендә Габдулла Тукай исемендәге ике республика премиясе билгеләргә.
- Габдулла Тукай исемендәге премияләр 1966 елдан башлап, республика премияләре Комитеты карары буенча, Габдулла Тукай туган көндә һәр елны бирелә.
- Габдулла Тукай исемендәге премияләргә кандидатлар күрсәтү хокукын Татарстан культура министрлыгына, иҗади союзлар идарәләренә, Бөтенроссия театр җәмгыятенең Татарстан бүлегенә, Татарстан китап нәшриятына һәм җәмәгать оешмаларына бирергә. Премияләрне бирүгә ике ай кала, күрсәтелгән кандидатларның исемнәрен һәм хезмәтләрен, киң итеп тикшерү өчен, матбугатта яктыртырга.
- Габдулла Тукай исемендәге республика премияләре Комитетын расларга.
Казан 11 октябрь, 1965 ел.