Юксыну

Кайтавазы ишетелер, бәлки,

Урманнарга керәм.

Куып тотсын иде, дигән сыман,

Алан буйлап йөгерәм.

Каенлыктан тавыш бирмәсме, дип,

Басу буйлап йөрим.

Әллә калды микән күмелеп, дип,

Ак карларны көрим.

Ялган күз яшьләрен күрмәмме, дип,

Ташуларга карыйм.

Челтер-челтер генә көлә белгән

Гөрләвекне таныйм.

Җәйгә чыксам, ак чәчәкләр җыеп,

Такыя үрәм иртән.

Сабый чагым – иң-иң садә чагым

Юксындыра икән...

"КУ" 11, 2018

Фото: pixabay