Яратуым – сагыш
Байгыш кебек ялгыз уйга калам,
Бер сәйләнгә тезәм үткәнне.
Көзләремдә язны көтеп алам,
Таңнар белә ничек көткәнне.
Язмышыммы соң син, ялгышыммы,
Бәхетемме яшьләр аралаш?
Әче сагышыммы, каргышыммы? –
Яшим шулай аңлар-аңламас.
Күзем ачылганда уемда син,
Исемең – тәсбих, уем – тегәрҗеп.
Ничә еллар юллар таба алмый
Яшим сөеп, көеп һәм... рәнҗеп.
Язмышым да, ялгышым да – сөю,
Тик үкенмим андый ялгышка.
Яраткан һәм яратылган өчен
Рәхмәт кенә әйтәм язмышка.
"КУ" 4, 2020
Фото: pixabay
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84