Хәерлегә

Бу көн булыр миңа хәерлегә,

Таңнан бирле иркәли яңгыр.

Колагыма кошлар дога сайрый,

Намазлыктай колач җәя кыр, –

Бу көн булыр миңа хәерлегә.

Кая бакма, шунда Коръән нуры,

Чәчәкләрдәй бизәп сибелгән.

Бу юллардан атлап үтәсемне,
Ниятемне ничек ул белгән? –

Бу сәфәрем булыр хәерлегә.

Ни җиткерә икән бөек Раббым,

Ни җиткерә динле калебкә?

– Манарадан азан әйтелгәндә,

Гамәлеңнән җаның калыкса,

Кыйблаң табып сәҗдә кылганда,

Йөрәгеңдә иман балкыса,

Бу килмешең булыр хәерлегә! 

АЛМАЗ ӘХМӘТГАЛИЕВ

"КУ" 11, 2023

Фото: unsplash