Көзге этюд

Алтын көзнең асыл мизгелләре...

Һаваларда – торна эзләре.

Җитәкләшеп өлкән парлар атлый...

Бик килешеп тора көз мәле.

Кемдер көтеп ала бу чакларны,

Мин качарга телим көзләрдән.

Тик җәйләрем җәйләнгән шул инде:

Күңел тулы моңлы хисләрдән.

Карлыгачлар киткән җылы якка,

Уйнап очмый минем тирәмдә.

Куагыннан өзелгән бер тәлгәш –

Көзге балан ята чирәмдә...

"КУ" 9, 2019

Фото: pixabay