Костым кичә сезнең фикер белән...

Костым кичә сезнең фикер белән,
Кысылмагыз, сорамаганда!
Күпме күмер эчтем, булышмады,
Сезсез дә мин хәер-догада,
Кысылмагыз, сорамаганда!
Эчне түгел, күңелләрне бора
Сезнең биргән киңәшләрегез.
Сорамадым, кирәк түгел үгет,
Үз юлыгыз белән йөрегез!
Үзем язмышымның батыры мин,
Үзем өчен үзем – Кол Шәриф.
Сез –
һәммәгез гарәп графикасы,
Мин берүзем монда Яңалиф!

Үзем һаман күккә үрелсәм дә
Аска таба тарта сезнең саз.
Җәмгыятьтә минем кебекләргә
Бик тиз килә, диләр, инкыйраз...
Килер вакыт, әйе, үләрмен мин,
Минем кебек булмастыр башка!
Зур хәрефләр белән сезнең түгел,
Минем исемем язылыр ташка!

Айзат Вахитов

«КУ» 06, 2026

Фото: Шедеврум ии