Халәт

Син бәхетле әле, шыксыз кышым,

Бик бәхетле!..

Елый аласың...

Күз яшьләре белән каплый алсам

Үзәк өзгеч төннәр карасын,

Күпкә җиңел булыр иде кебек...

Сабырларым сынган бу мәлдә

Борыламын тәкъдир тарафына,

Кемнәр, диеп, тагын бу хәлдә?

Синең тавыш килә... Үксегәнең...

Югалганнар ап-ак тәңкәләрең...

Мөлдерәшеп гөмбәз чоңгылында

Көтәләрдер алар әнкәләрен...

Мин үзем дә күкләр хөкемендә –

Теләнәмен гомер газиземә.

Сабыр касәләрен чайпалдырмый

Бу бала соң ничек түзә, димә.

Синең тавыш килә... Үксегәнең...

Агартмакчы төннәр карасын...

Син бит миннән күпкә бәхетлерәк,

Шыксыз кышым,

Елый аласың!..

"КУ" 1, 2017

Фото: pixabay