Еш(ы)рак елмай син...

Еш(ы)рак елмай син,

Куанып, шатланып,

Яңа көн туган бит:

Вәт менә яңалык!

Агачлар оялып,

Яңгырда юына,

Йолдызлар юк күктә,

Барысы да куеныңда.

Болытның яртысын

Букчаңа син сал да:

«Мин аны беркайчан

күрмәдем», – дип алда.

Бүгенге дустың да

Нәселсез эт кенә,

Урамнар – сатлыкҗан,

Тамчылар – йөк кенә.

Берни дә үзгәрмәс,

Яуса да күктән таш.

Син бүген бәхетле:

Яланөс, яланбаш...

"КУ" 05,2022

Фото: pixabay