Еш буталып, мине күрәсеңме...

Еш буталып, мине күрәсеңме
Таныш түгел чит-ят йөзләрдә?
Яңгыр белән җилне сүгә-сүгә,
Эзлисеңме һаман көзләрдә?
Минем өчен дога кыласыңмы,
Таң алдыннан, яңгыр яуганда?
Озын-озын хатлар язасыңмы,
Өйдә кеше-мазар югында?
Төннәрең дә шулай йокысызмы,
Күз ачыткыч бушлык биләсә?
Ялгыз җилләр тәрәзәңне шакып,
Мине хурлап, гайбәт сөйләсә.
Бер сәбәпсез урам гизәсеңме,
Онытып кай якка баруың?
Син дә шулай сагынасыңмы икән
Мин сагынган сыман, сылуым?!

"КУ" 05, 2021

Фото: pixabay