Ана бүре өне

Ул җил минем күкрәгемә
очып кереп җиткәнче
изге Ак бүре йөрәге
аша исеп үткән җил!
Ренат Харис

Минем канда ана бүре улый.
Улый айга карап, күккә карап.
Кара гына төндә,
Без белмәгән телдә,
Һәр авазын йөрәгемә кадап,
Бүре улый.
Чал карашлы күктән,
Чуерташлы җирдән
Кайтавазын көтәм мин бу өннең.
Очкын булып чәчрәп,
Яшен булып яшьнәп,
Ярыр сыман берчак кара төнне
Бүре өне.
Ап-ак сагыш булып,
Ап-ак өмет булып,
Улый, улый, улый Ак бүре.
Сискәндереп җанын, ишетәме аны
Утлап йөргән гавам өере?
Ишетәме? Уятамы канын,
Җилдән җитез чагын,
Бия сөте тәмен,
Зәңгәр күкләр ямен
Сусыл дала исен,
Татлы хөрлек хисен
тавышы?!
Бу аһәңнең үтеп барышымы?
Бу моңнарның китеп барышы?..

Тәңре-Күктән сора,
Җиргә ятып тыңла,
Аңламасаң бүре оранын.
Сөйләдеме әбкәң?
Көйләдеме әнкәң?
Абайлыймы аны оланың?
Кан куерып ала
Бу аваздан кинәт,
Шашып кала этләр өере.
Кара гына төндә,
Без белмәгән телдә
Улый, улый, улый Ак бүре...

"КУ" 07, 2021

Фото: pixabay