Тормыш

Тормыш безгә көн дә нидер бирә:
Акылын да, шатлык, сынавын.
Кайчакларда и сындырып карый –
Бизмәннәргә сала чыдамын.

Хыялларга күмеп ата кайчак,
Кайсын кочарга да белмисең!
Ә кайчакта рәхәтләнеп өргән
Урам этеннән дә көнлисең...  

Үкенүләр аяк асларында
Сизмәстән дә үзе урала.
Тормыш кырыс! Тормыш якты, татлы
Утка сала, тели – суга да!

Тормыш шундый: кем – дус, кемнәр – дошман –
Бер минутта ача күзләрең!
Тормыш – әкият! Җиңеп яшәп була,
Тик нык булса гына үзәгең.

 

Фото: pixabay