Сылу

Буй-сыныңнан көнләшәләр таллар,

Биюеңә һәркем таң кала,

Шаян күзләреңдә ай чаткысы,

Йөзләреңдә кояш яктысы!

Ходай биргән аһәң ташып чыгар,

Күңелеңә дәртле моң саргач,

Авазларың - чишмә чылтыравы,

Җырың сузсаң - тына сандугач!

Толымнарың гүя куе урман,

Елмаюың - офык балкышы,

Бит очларың - тулып пешкән алма,

Табигатьнең гузәл ачышы!

Тәңрем сине берүк саклый күрсен,

Күз карашың - төпсез тирән күл,

Кайгы-хәсрәт сине урап узсын,

Бәхет өчен туган изге гөл!

Марсель Шарапов. Арча районы

Фото: pixabay