Көтә халкым...

Түзә алмыйм дәшми ташлар сыман:

Ничек булмак кирәк таш йөрәк?!

Гаделсезлек яшәгәндә җирдә,

Тукай була белү — бик кирәк!

Һич аямый, төлке-арысланнар

Селкеткәндә милләт агачын,

Җиргә коеп, телне таптамакчы,

Ничек дәшми түзеп каласың?!

Көтә халкым, әмма һич шикләнми,

Юлбарыс-егете киләсен!

Төлке-йөзен ачып арысланның,

Милләтенә таҗын эләсен!

Җир анадай түзем минем халкым,

Язмыш аңа күпне күрсәтте!

Әйтсәк әгәр Туфан ага сыман:

"Бәйлисе бар кысып йөрәкне!"

Гөлия Фәизова. Яр Чаллы шәһәре

Картина авторы: Фәридә Хәсьянова