Сөйкемле кыш

Төште гыйшкым минем кыш аена,

Гашыйк булдым яуган ак карга...
Кар көртләрен минем эзләр бизи,
Мин сукмаклар ярам яктыга!
Кичен ошый ишеп кар яуганы,
Иртәләрен - таңнар атуы,
Ә соңыннан мине әсир итә
Серле генә кояш батуы.
Бу күренеш кабатлана һәркөн,
Ләкин һәркөн үзгә, үзенчә:
Бүгенгесе булмый кичәгедәй,
Иртәгесе булмый бүгенчә...
Бүген дә мин йокыга китәрмен
Бураннарның әче көенә.
Алар моңсу, алар өзгәләнә,
Ә күңелем,тиле, сөенә...
Алсу СӘЛАХОВА,
Яңа Чишмә районы Чаллы Башы урта
мәктәбенең 11 сыйныф укучысы.