Сер

Ничә еллар беләм. Син барыбер

Минем өчен бетмәс сер, дисең.

Никадәрле мине беләсең син,

Шулкадәрле мине белмисең…

Мин үзем дә әле үземне бик

Тулысынча белеп бетермим.

Бер карасаң, бәхет китерәм мин,

Бер карасаң, берни китермим.

Бер карасаң, бик тә акыллымын,

Бер карасаң, артык тилемен…

Бер карасаң…

Тик бер карау өчен

Туган кешемени инде мин?!

Мин бер карар өчен яшәмәдем,

Бер карама миңа, мең кара.

Меңәр тапкыр меңнәр карасаң да,

Ачылырга торган сер кала.

Ничә еллар беләм, син барыбер

Минем өчен бетмәс сер, дисең…

Ничә еллар мине беләсең син,

Ничә еллар мине белмисең…

"КУ" 11, 2019

Фото: pixabay

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: