Туфани тел кодрәтенә тиңнәр бармы...

Үз тамыры мең тармаклы булгангадыр
Кыйтгаларны колачлаган ябалдашы.
Туфани тел кодрәтенә тиңнәр бармы -
Җир-ананың җан тибеше – аваздашы.

Тамырлары торган саен тирәнгәрәк,
Ә тел үзе омтылганга биеклеккә,
Үзәгенә боҗраланган меңъеллыклар
Тел байлыгын киләчәккә мирас итә...

Ганимәтле мирас булган тел байлыгы -
Яратылгач җир йөзенә бар тереклек,
Сугарылып әүвәл әңкә сөте белән
Галәми аваз салгандыр - сүздән элек...

Һәм мәңгелек күк астында һәр милләтне,
Милләт иткән мең тармаклы тел галәме
Колачлаган иң борынгы мәгърур телнең
Олпатлыгын ташка уйган үз каләме...

Фәүзия Мөхәммәтова. Норлат

фото: vk.com

Нравится
Поделиться:
Реклама
Комментарии (0)
Осталось символов: