Рәхмәтлемен туган җиремә

Рәхмәтлемен сиңа, туган җирем,

Сулап туймас һаваң булганга,

Алсу таңда туган төбәгебез

Кояш нурларына тулганга.

Рәхмәтлемен сиңа, табигатем!

Ямьле язың, җәең, көзеңә.

Бар мизгелең матур, яуган кар да

Бик килешә кышың үзеңә.

Рәхмәтлемен сиңа, туган җирем!

Эчеп туймас суың өчен дә,

Чишмә күзләреннән ятып эчкән

Суның тәме мәңге исемдә.

Рәхмәтлемен, сиңа туган телем!

Үз телемдә сөйлим, ишетәм.

Тамырларым синдә булган өчен,

Туган җирем сине үз итәм.

Гөлфия Гыйззәтова. Әлшәй районы

фото: pixabay