Күрә белсәң

Ак бәс сорган агачларны күреп

И сөенгән синең бу балаң.

Күңелемдә туган ак хисләрне

Көйгә салып менә җыр язам.

Дөньясына тоташ аклык иңгән

Гаҗәпләнеп күпләр тукталган.

Миләш ботаклары актан булса,

Тәлгәшләрен гүя ут алган.

Күңел күзе белән карау кирәк,

Маңгай күзе барсын күрмидер.

Кышкы миләшләрдән күңелемә,

Сиздермичә ялкын үрлидер.

Әлфия Сибгатуллина. Түбән Кама

Фото: pixabay