Каләм тибрәтүчеләр
Бозлар китә
Киткән бозлар белән китсен,
Аксын, дидем, кайгылар.
Ырым-шырымга ышанган
Азмы инде андыйлар?
Бозы китте, яры калды —
Ярында калдым үзем.
Ярда калган ялгызларга
Бирче, Ходаем, түзем.
Берсен-берсе өтә-төртә,
Акты-акты бозлары.
Киләсе елларымда да
Көтсен якты язлары.
Ярсып-ярсып ага инде,
И болганчык сулары.
Сулар кебек гомер ага,
Әрнү сала шулары.
Кояш карый, кошлар сайрый,
Кошлары ла талларда.
Сайрап яшәр гомер бирсен
Яратышкан ярларга.
Бозы китте, яры калды —
Ярында калдым ялгыз.
Ярда калган ялгызларга
Мәрхәмәтле бул, язмыш.
Нурлан ГАНИЕВ. Башкортстан
Иң мөһим һәм кызыклы язмаларны Татмедиа Telegram-каналындаукыгыз
Нет комментариев