Язмыш

Аз төйдеме безнең башны

Язмыш дигән бу тормыш?

Күккә чөйде, ярдан атты,

Юлда текә борылыш.

 

Аз суктымы кул-аякка

Язмыш атлы бу еллар?

Тоташ сынау, җәбер, җәза,

Түзмәс, диептер, — елар!

 

Салкын җилләр үзәкләргә

Тиде дә өтеп алды.

Маяк булган өмет сүнде,

Үкенеч кенә калды.

 

Сыпырып төшерсәң чәчтән

И бу ап-ак карларны!..

Язып кәгазьгә калдырам

Җанга сыймас зарларны.

 

Сагышым салам шигырьгә,

Бушасын, тынсын күңел.

Гомер гел бәхеттә узмый,

Хыялда очу җиңел.

Гөлфия Исхакова

 

"КУ" 2, 2015

Фото: Pixabay

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: