Владимир Путин Рәҗәп Эрдоган белән очраша

Россия Президенты Владимир Путинның бүген Төркиягә сәфәре планлаштырылган. Анда ил Президенты Рәҗәп Эрдоган белән очрашуы планлаштырылган. Бу хакта Кремль матбугат хезмәте хәбәр итә.

"Россия-Төркия мөнәсәбәтләре, төбәк һәм халыкара көн үзәгенә куелган актуаль мәсьәләләр буенча фикер алышу булачак, илләр арасында документ имзалау планлаштырылган", - диелгән хәбәрдә. Путин шулай ук Истанбулда XXIII дөньякүләм энергетика конгрессының махсус сессиясендә катнашачак. Форум кысаларында башка дәүләтләр башлыклары белән очрашулар көтелә.

Бу Путинның җавап визиты дисәк тә була - августта Россия һәм Төркия президентлары Санкт-Петербургта очрашканнар иде. Бу Россия-Төркия мөнәсәбәтләренең 2015 елның 24 ноябрендә Төркия тарафыннан Россиянең Су-24 самолеты бәреп төшерелгәннән соң кискенләшкән чор тәмамлангач беренче очрашулары булды. Эрдоган гафу үтенүгә карамастан, Төркиянең рәсми матбугаты әле дә бомбардировщик ил чиген бозган дип белдерә.

Чыганак: http://tatar-inform.tatar