Республи­каның һәрбер районында "Мәк­тәпкә җыенырга ярдәм ит!" акциясе уздырыла

Быел республикада 1 нче сыйныфка 47 меңнән артык бала барачак. Шу­лар­ның бер мең ярымын хәйрияче абый-апалары букчалар белән сөен­дерергә өлгерде инде. Бүген республи­каның һәрбер районында “Мәк­тәпкә җыенырга ярдәм ит!” акциясе уздырыла. – Әлеге чара безгә балачак иленнән булуыбызны ис­кә төшерә. Аз керемле, күп балалы, авыр хәлле гаи­лә­ләр­дәге сабыйларга уку ки­рәк-яраклары тутырылган букчалар тапшырабыз. Хәй­рия ярдәме мохтаҗ булган 2 – 11 нче сыйныф укучыларына да каралган. Балалар бүләк­не бик сөенеп кабул итә, – дип сөйләде кичә Татарстан Президен­ты­ның ярдәмчесе Ләйлә Фазлыева Хөкүмәт йортында узган чарада. 2007 елдан бирле үткә­релүче бу чарада барлыгы 165 мең 1 нче сыйныф укучысына 210 миллион сумлык яр­дәм күрсәтелгән. Быел 2 – 11 нче сыйныф уку­чыларының меңгә якыны мондый бүләк­не алган. 7 августта акциягә Татарстан Дәүләт Советы Рәисе Фәрит Мөхәммәтшин белән рес­публиканың баш педагогы Энгель Фәттахов катнашында Алабугада узган чарада старт бирелгән иде. Тагын берничә көннән соң Президент Рөстәм Миңне­ха­нов Нурлат балаларына букча өләште. Сөенечле вакыйгалар әле августның соңгы көннәренә кадәр дәвам итә­чәк. Теләгән һәр кеше игелекле эшләрдә үз өле­шен кертә ала. Акциядә төр­ле предприятие, оешма, эшмәкәрләр актив катнаша. Ярдәм чарасы төрле булырга мөмкин. Кемдер уку әсбаплары алу өчен игелек марафоны уздыра, кайбер районнарда хезмәт­кәр­ләр бер көнлек хезмәт хакы белән бүлешкән. Кибет­ләр­дә махсус тартмачык куяючылар да бар. Пред­прия­тиеләр дә үз эшчеләренең балаларына бәйрәм оештыра башлады. Кыскасы, быел 20 меңләп баланы бүләк көтә. Чара кысасында аутизм, дислексия (сөйләм һәм язу күнекмәләре бозылу) бе­лән интеккән балалар белән шөгыльләнүче педагог, табиблар өчен махсус семинар оештырмакчылар. Балаларга гына түгел, мәктәпкә дә ярдәм итәргә була. Республикада 2013 елда “Үз мәктәбеңә ярдәм ит!” акциясе оештырыла баш­лаган иде. Татарстан мәгариф һәм фән министры урынбасары Тимерхан Алишев белдер­гәнчә, быел 386 белем һәм тәрбия бирү учрежде­ние­сенә 10 миллион сумлап яр­дәм күр­сә­телгән. Иганәчеләр арасында төзелеш материаллары, җиһазлар, компьютер техникасы белән булышучылар да бар. Бигрәк тә Кукмара, Арча, Казан мәктәп­лә­ренә саллы өлеш керткән­нәр. Ә Бөгелмә районы укучылары олы тормыш юлына баскач та туган мәктәбен онытмый икән. Аларның ярдәме белән бер миллион сумнан артык акча җыелган. Ә республика программасы нигезендә биш-алты ел эчендә барлыгы 753 мә­гариф оешмасы төзеклән­дерелгән.  

Ватаным Татарстан