Кемгә – машина, кемгә – бина?

Җиңүчеләргә 100 машина бирелде. Моңа кадәр начар шартларда эш­ләгән берничә авыл җирлегендә яңа бина ачылды. Республика бәйрәме узган көннәрдә муниципаль берәм­лекләр советы әнә шулай башкарылган эшләрне барлап, игълан ителгән  конкурсларга нәтиҗә ясый. Җирле үзидарәләрнең эш­чәнлеген яхшырту максатыннан 2011 елда махсус конкурс игълан ителгән иде. Җиде ел эчендә шәһәр һәм авылларга 1670 машина би­релгән. Совет җитә­­к­чесе Минсәгыйть Шакиров сүзлә­реннән күренгәнчә, барлык авыл советы җи­тәкчеләре дә “корыч ай­гыр”­лы булган. Ә моңа кадәр күпчелек авыл советы рәисләре үз машиналарында йөрергә мәҗбүр иде. Әлеге хәлдән чыгу максаты белән муниципаль бе­рәмлек советы җирлекләр арасында махсус конкурс уздырырга карар кылган булган да инде. Нәтиҗәдә аеруча зур күрсәткечләргә ирешкән кайбер авыллар машинаны ике тапкыр (искесен тапшырып) алу бәхе­тенә ирешкән. Азнакай районы­ның Сәпәй авыл җирлеге башлыгы Фәния Галиева машинаның эш барышында бик тә кирәк булуын белдереп, республика җитәкчеле­генә рәхмәтен дә җиткерде. “Без смотр-конкурслар уздырып, җир­лекләрнең дәрәҗә­лә­рен үстерү юнәлешендә дә эш алып барабыз”, – диде Рөс­тәм Миңнеханов әлеге уңайдан. Бүген авыл җирлеклә­ренә зур бурычлар йөклән­гән. Тик аларның эшли торган административ бинала­рының бик фәкыйрь хәлдә булуы күпләрне борчуга сала килде. Биналарның шактый искергән булуыннан, өстә­венә кышкы чорда җылы тормавыннан, шул ук вакытта яктылык җитмәү­дән зарландылар. Әлеге хәл­не яхшырту уңаеннан республика Президенты махсус программа кабул итәргә дигән күрсәтмә бирде. Узган ел иске биналарны ремонтлау, яңасын салу юнәлешендә эш алып барыла башлады. Быел шундый 11 авыл советына яңа бина төзелде. Зәй райо­нының – Аксар, Мама­дыш­ның Түбән Тәкәнеш авыл җир­лекләре яңа эш урынына күченгән инде. Бу көннәрдә Биектау районының Каенлык авылында да, Лаеш районы­ның Октябрьнең 25 еллыгы бистәсендә дә өй туйлары гөрләде. 30 август көнне совет рәисе Минсәгыйть Шакиров Балтач районының Норма авыл җирлегендә административ бинаны ачу тантасында да катнашты. – Элеккегесе белән хә­зергесен чагыштыра торган түгел инде, – ди Норма авыл җирлеге башлыгы Тимур Гатауллин. – Минем биредә эшли башлавыма ике генә ел. Эшкә урнашу белән бина­бызның бик начар хәлдә булуын әйттем. Баксаң, миңа кадәр эшләгән авыл советы рәисләре дә бу проблеманы күтәргән булып чыкты. Ни кызганыч, махсус программа булмагач, яңа бинаны салуны  кичектереп торырга мәҗбүр булганнар. Мөмкинлек килеп чыгу белән эшкә тотындык. Норма авыл советы озак еллар фин технологиясе буенча эшләнгән иске генә йортта утырган. Бернинди дә уңайлыклары юк иде, дип искә ала җирлек башлыгы. Кергән кешеләр дә, бигрәк ямьсез урында эшлисез, дип әйтә торган булган. Берничә ай эчендә иске бина янында яңасы калкып чыгар дип башларына да килмәгән. Бу хәлләргә күңел ышанмый, ди ул. – Җирлек башлыгы янына халык төрле сораулар белән килә, – диде совет җи­тәкчесе Минсәгыйть Шакиров әлеге уңайдан. – Ул кеше­ләрне начар бинада кабул итәргә тиеш түгел. Килү­челәрне ачык чырай белән матур бинада каршы алу – үзе зур дәрәҗә. Әгәр дә проб­лемасын да шунда ук хәл итеп җибәрә аласың икән, бу авыл кешесенең җитәкчегә карата булган хөрмәтен тагын да арттыруга китерәчәк.    

Лилия Нурмөхәммәтова, Ватаным Татарстан