Игътибар көн дә кирәк...

Республикада 55 мең 188 сугыш ветераны яши. Араларында инвалидлар, Ленинград камалышында калган кешеләр, балигъ булмаган тоткыннар, сугышта катнашучылар, тыл хез­мәтчәннәре бар. Аларның сафлары елдан-ел кими бара. Шуңа да аларның кадерләрен белеп, хөрмәтләп калырга тырышабыз. – 2006 елдан башлап Бөек Ватан сугышы ветераннарына, аларның толларына бирелә башлаган фатир тапшырылу дәвам итә. Быел 123 ветеранга фатир ачкычлары тапшырылачак. Шулай ук мөмкинлеге булмаган, фатиры төзекләнде­рүгә мохтаҗ кешеләргә ярдәм булачак, – ди хезмәт, халыкны эш белән тәэмин итү һәм социаль яклау министры урынбасары Юлия Абдреева. – Күп кенә сугыш ветераннары, инвалидлары өйдән чыгып йөри алмый. Андыйларга социаль хезмәткәрләр беркетелгән.   2016 елда Президентның ярдәме белән авыл җи­рендә ялгыз яшәүче ветераннарга социаль хезмәт­ләр бушлай башкарыла баш­лады. Дөрес, дәүләт тарафыннан тиешле ярдәмгә шөкер иткән, риза булмаган ке­ше­ләр дә бар. Әмма җи­тәк­челәрне тыңласаң, зарланырлык урын юк. Татарстан сәламәтлек саклау минис­тры урынбасары Фәридә Яркәева ветеран­нарның диспансеризация үтүләрен әйтеп узды. “Өлкәннәрнең күбесенең  өйләренә барыр өчен махсус төзелгән төр­кем бар. Авырып киткән очракта өлкәннәргә хезмәт күрсәтүче ике госпиталь эшли. Казанда һәм Чаллыда урнашкан бу хастаханәләр­дәге палаталар ветераннар өчен бик уңайлы итеп җи­һазландырылган”, – ди ул. Республикада яшәүче сугыш ветераннары бушлай колак аппараты алу һәм теш куйдыру мөмкинлегенә ия. Ел дәвамында 162 кеше колак аппараты алган, 15 меңләп кеше теш куйдырган. Бәйрәм җитә “Һәр өлкән кеше Җиңү бәйрәмен түземсезлек бе­лән көтә. Бу көнне алар иң кадерле киемнәрен киеп, түшләренә орден-медаль­ләр тагып бәйрәмгә чыга. Без дә аларның күңелләрен күрергә тырышабыз”, – ди Татарстан Президенты яр­дәмчесе Ләйлә Фазлыева. Озакламый бәйрәм чаралары башланып китәчәк. Күп кенә мәктәпләрдә ветераннар белән очраша башлаганнар инде. Әмма рес­публиканың төп чарасы 8-9 майда булачак. Районнарда яшәүче өлкәннәрнең сәла­мәтлекләрен бүгеннән үк кайгырта башлаганнар. Алар барысы да табиб күзәтүе узган. Башкалага юл тотар алдыннан һәркай­сы­ның тагын бер кат сә­ламәтлеген тикшерәчәк­ләр. Юлда аларны табиблар озатып барачак. Бәйрәм вакытында ветераннарга волонтерлар да ярдәмгә атлыгып тора. Районнарда да бәйрәм чарасына әзерлек башланган. Үзгәрешләр бар Быел Казанда узучы Җиңү парадының урыны үзгәргән. Аны Меңьеллык мәйданга күчергәннәр. “Җи­ңү бәйрәме уздырганда кайбер урамнарда машиналар өчен уңайсызлыклар туарга мөмкин. 3-5, 7-8 майда парадка әзерләнү, репетиция узачак. Бу көн­нәрдә машина йөртүчеләр Меңь­еллык мәйдан тирә­ләрен урап узсын иде. Юл йөрү генә түгел, куркынычсызлыкны да кайгырту мөһим. Быелгы чарада 5 меңләп полиция хезмәткә­ре кизү торып, бәйрәм уза торган мәйданнарга махсус тикшереп кенә кертәчәк­ләр”, – ди хокук саклаучылар. Шулай ук “Үлемсез полк” та башка мәйданда уза. Вакыты да үзгәргән. Уз­ган ел “Казан” милли мә­дәният үзәге янына җые­лып, Кремльгә таба хәрәкәт итсәк, быел Ершов урамы ягыннан Толстой урамына җыеласы. Бәйрәм көнне машиналарыгызны читкә куеп, маршрут автобуслары белән Горький исемендәге парк тукталышында төшеп, җәяү хәрәкәтләнергә кушалар. “Үлемсез полк” акция­сенә көндезге бердә җыела башлыйлар. Сәгать өчтә кузгалып китәчәкләр. – Акциягә махсус бил­геләнгән башка урамнардан да кушылырга була. Әмма Ершов урамыннан башласак, күңеллерәк булыр сыман. Без быел Мәс­кәүдә­геләр һәм башка күп кенә төбәкләр белән бер вакытта кузгалабыз. Кулларыгызда горурланырлык ке­ше­лә­регезнең фотосы булсын. Аның нинди булуы да мөһим түгел. Әби-бабай­ларыбызны барлап, хәтер­не саклыйк. Узган ел кеч­кенә балалары белән дә акциядә катнашучылар бар иде. Димәк, балалар белеп үсәчәк. Безгә тыныч көннәр бүләк иткән өлкәннәрне онытырга хакыбыз юк”, – ди Ләйлә Фазлыева. Нәкъ менә шул оныту-онытмау хәтерләрне калдыра да инде. Бәйрәмгә кадәр бу хакта күп сөй­лә­нелсә дә, тантаналар узгач үпкәләп шалтыратучылар да була. Әби белән бабай бер йортта яшәп тә, берсенә котлау открыткасы килә, икенчесенә юк. Кемдер, ашамлыклар тутырылган пакет эләкмәде, ди. Әнә шулай күңел кителмәсен өчен, оештыручылар барысын да эшләргә вәгъдә итә.

Гөлгенә Шиһапова, Ватаным Татарстан