Чаллы татар дәүләт драма театры Мостай Кәримнең "Ай тотылган төндә" әсәре премьерасын әзерли

Татарстанның Чаллы татар дәүләт драма театрының иҗат төркеме премьера әзерли. Тиздән тамашачыларга Мостай Кәрим әсәре буенча "Ай тотылган төндә" драмасы тәкъдим ителәчәк,  дип яза "Челнинские известия" газетасы. Яңа спектакльнең иҗат төркеменә рәссам, Россия һәм Калмыкиянең атказанган сәнгать эшлеклесе Валерий Яшкулов, композитор, атказанган сәнгать эшлеклесе Юрий Чаплин, балетмейстер Нурбәк Батуллиннар кергән. Рольләрне Россиянең атказанган, Татарстанның халык артисты Инсаф Фәхретдинов, Татарстанның халык артисты Булат Сәлахов, Татарстанның атказанган артистлары Энҗе Шиһапова, Илфат Әскәров, Рәфыйк Каюмов, Рафиль Сәгъдулиннар белән берлектә труппаны бу сезон башында гына тулыландырган яшь артистлар Руслан Әюпов, Дастан Бабаханов, Зөлфия Гыйльметдинова һәм Зөлфия Галиуллиналар башкара. Чаллы татар дәүләт драма театрында әзерләнгән спектакльнең премьералары 25 һәм 26 февральгә билгеләнгән.

Чыганак: http://tatar-inform.tatar