Гаярьләр

Язгы кич. Торналар чылбыры

Талпына, шәфәкъка үрелеп.

Әйтерсең, биләүдә һәрбер кош

Тибрәнә, бер моңга төренеп.

Бер урын буш калган төркемдә –

Шуңамы җырлары аяныч?..

Кайдадыр баш салган гаярь кош

Табалмый чит җирдә таяныч...

Күңелем күзендә бу урын

Буш түгел – ап-ак эз күренә.

Нәселнең буынын тотышып,

Кош җаны кайтамы иленә?!

Ишетәм мин аваз: «Кавемем

Үз эзен сакласа һавада,

Җанымны һәркемгә бүлгәләп

Яшәрмен гел сезнең арада».

"КУ" 6, 2016

Фото: pixabay