Ат холыклы шагыйрь

Атлар саклап үстек. Шуңа

Бераз ат холкы бездә...

Газинур Морат

Матур язу дәресеннән

Качып чыгып киттек без.

Су буенда учак ягып,

Әйе, атлар көттек без.

Үсеп җиттек, шагыйрь булдык,

Булалмадык атташе.

Ат башы тоттык сукада,

Ә гәзиттә – сүз башы.

«Мәдәни җомга» гәзите

Безнең сүздән башлана...

Шул сүз башын укый алмый,

И татар газаплана:

Фикерләвең – бик фәлсәфи,

Укып булмый бит, диләр.

Матур язу дәресеннән

Качып йөргәнгә, юләр...

Ат көтүе көтеп үстек,

Холкыбыз да атныкы.

Иң «матур язу» татарда –

Газинур Моратныкы!

"КУ" 10, 2020

Рәсем авторныкы