Ватан тойгысы

Мин фәлсәфә ташын эзләп киләм.

Ул тирәндә ята, тирәндә.

Ак уйларым ташый күбекләнеп,

Очар кошлар сайрый тирәмдә.

Челтер-челтер ага чишмә суы,

Пышын-пышын үлән чайкала.

Сәлам биреп байый кызыл кояш,

Кичен күктә сердәш ай кала.

Җирдә булган барлык матурлыкка

Томырылып, сөеп күз атам.

Төннең кочагына чалкан ятып,

Йолдыз агышларын күзәтәм.

Татлы һава – тормыш нигезедер,

Туган телем – чиксез хәзинә.

Канатлансам, Тукай катламына

Җитми кала күңелем әз генә.

Тәнемдәге күзәнәкләр саен

Кайный җанда Ватан тойгысы.

Мин сүзләрдән асыл мәрҗән үрәм,

Бу шигырем – булмас соңгысы!

Мин фәлсәфә ташын эзләп киләм...

"КУ" 04, 2024

Фото:  unsplash