Үзгәрдек

Үзгәрдек...Үзгәрде замана, кешелек

Гөнаһын юарга тырыша дөньяның.

Өч яшьлек онык та урысча сукалый,

Ахрысы...Үзем дә соңарып уяндым.

Үзгәрдек... Кешенең горефе-гадәте,

Замана таләбе яктыга әйдәде!—

Мәңге бер намазга чүкмәгән ханымнар

Яулыклар бөркәнеп, тәкъвага әйләнде.

Үзгәрдек...Челтәрле капкалар биклеләр.

Ни булган?..Кешеләр бер-берсен иш итми.

Бергәләп гөрләшеп-җырлашып яшәргә,

Әйтегез, дөньяда бәндәгә ни җитми?!

Үзгәрдек... Үзгәрттек тормышны. Ә бүген...

Йолдызлар тынлыгы авылым күгендә.

Юк хәзер йолдызлар санаучы гашыйклар,

Бары тик үткәнне сагыну күңелдә.

Үзгәрдек...Кешелек үзгә бу заманның,

Әйтерсең юарга тырыша карасын.

Бер яхшы ягы бар: иркенләп сүз алып,

Дәүләтне эт итеп орыша аласың...

Шагыйрь Роберт Сәлахиевның башка шигырьләре март санында дөнья күрәчәк.