Томанлы иртә
Сөн буйлары – ап-ак томан... Бүген болыт – җәяүле.
Бәлки, таңда савымчының түгелгәндер чиләге?
Безне юксынудан үксеп, йолдызлар яшь койганмы?
Әллә кояш, йөз яшереп, аксыл пәрдә корганмы?
Төн – көн арасында томан сыгылмалы басмамы?
Киләсенең йөз-фигылен яшергән ак язмамы?
Йокымсырап, йортлар йөзә.. Ага агач, куак та...
Тау гына тау булып калган биектә һәм еракта.
... Әкияти сер-хикмәт бар гади генә томанда.
Ачылмаган серләр калды томан йоткан елларда.
"КУ", 2023, 1
Фото: pixabay
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84