Тансыгым!

...ә син мине ишетәсең икән,

нәрсә кирәк тагын җир йөзендә?

Бездән калыр ялантәпи эз дә,

резедалар, йолдыз исе сеңгән,

тансык тоелмаган өч сүз генә.

Шул сүзләрдән галәм яралганын тоеп...

берәү кинәт елмаер.

Уйламагыз кирәк, диеп, яшәү,

тынгы җуеп, җанга кинә җыеп:

заманасы, имеш, болгавыр!

Ул кичә дә булган нәкь шушындый,

иртәгә дә шундый булачак –

без, сулышны бераз иркенәйтеп,

зинданнарын җанның шыр җилләтеп,

өр-яңадан әгәр тумасак...

Һәркем баса, үз чишмәсен табып,

җан көйдереп торган ярсуны.

...җирдә сине ишетәмен икән,

нәрсә кирәк тагын шуннан артык,

нәрсә кирәк тагын,

Тансыгым?!

"КУ" 12, 2020

Фото: pixabay