Син ир бала

Улым Инсафка

Син – ир бала!
Шуңа сиңа вакытында акыл,
Вакытында камчы килешә!
Син – ир бала!
Шуңа синдәй зирәк фикерлеләр
Морадына һәрчак ирешә!
Син – ир бала!
Шуңа сиңа – атланырлык атың,
Учак саклар хатын тиешле!
Син – ир бала!
Шуңа синең барыр юлың иркен,
Кыяфәтең горур, килешле!
Син – ир бала!
Шуңа күрә егетләрчә итеп
Язылалар бүген юлларым.
Син – ир бала!
Ир балалы миллионлаган ана –
Сиздермәскә тырышадыр гына –
Сагыналар алар улларын…

«КУ» 11, 2024

Фото: unsplash