Шаһзадә

Туктап, сиңа сокланалар

Яныңнан узган бере.

Нидә соң моның хикмәте,

Нидә соң моның сере?

Синдә генәдер, мөгаен,

Кашның кара кыйгачы.

Син кайсының бердәнбере,

Син кемнең сандугачы?

Синдә генәдер йөзнең дә

Ал таңнардай нурлысы.

Килә сине иркәлисе,

Килә сине зурлыйсы.

Эзләсәң дә, табылмастыр

Сиңа охшаш игезәк.

Син бу җиргә күктән иңгән

Үзенә бер ак бизәк.

Миңа сузган ак кулларың

Карлыгач канатыдай.

Синең кебек башка юктыр

Баш җуеп яратырдай.

"КУ" 12, 2019

Фото: pixabay