Сары йорт

 Адлер Тимергалин рухына

Юлбашчылар юл яздырган чакта,

Ватан язган чакта акылдан,–  

Кара чорларда да, чыраг тотып,

Якты эзләүчеләр табылган.

Чыраг тотып якты эзләгәннәр

Җәһәннәмнән, Дию өненнән.

Ә илләрдә көннәр әверелгән

Тоташ Варфоломей төненә.

Иләмәннәр илне мәңге килмәс

Якты киләчәккә әйдәгән.

Газиз ватан үзе биниһая

Шыксыз сары йортка әйләнгән.

Сары йортка ябып саргайтканнар.

Азлар белгән – кайда чын, ялган...

Томанасы – гыйлем иясенә,

Гыйлемлесе җүләр саналган.
Бер мыскал да якты кермәсен дип

Томаланган тәрәз-ишекләр...

Күккә ашасы җан шул мәхшәрдән

Исән чыккан икән ничекләр?!

Күккә ашасы бу җаннарны соң

Нинди фәрештәләр саклаган?

Нинди генә кара дәвердә дә

Гали затлар булган, ак калган!

Ак калганнар – кара яксалар да,

Ак калганнар – кара йокмаган...

Сантый хаким булса, хәкимнең дә

Башы чыкмас сары йортлардан.

Юлбашчылар юл яздырган чакта,

Юлдан язган чакта халыклар,

Чыраг тотып, якты эзләүчеләр

Һәрчак булган, һәрчак калыккан.
 

"КУ" 05,2023

Фото: unsplash