Нинди булыр, белмим, гомер гыйләвәсе...

***
Нинди булыр, белмим, гомер гыйләвәсе,
Бакыйлыкка суздым шигырь гөлләмәсе.
Гомер генә җитми икән аңлар өчен:
Өч аршын җир – һәр кешенең биләмәсе.
***
Алданып бер җилгә очар алкышка,
Һаман чабам бу мәгънәсез ярышта.
Инде чәчем җилкән түгел бик күптән,
Тик нишлим соң? – Алтыдагы алтмышта.
***
Сүзем өстен чыга дип кем кычкыра? –
Көчәнә дә сүзен җилгә очыра.
Сулар ага, комнар күчә, җил исә...
Таулар гына дәшми-тынмый тик тора.
***
Кеше гаҗәп – акыл да бар һәм хис бар,
Яшәешкә һич туемсыз шәхес бар.
Өстәвенә өмет итә җәннәтне, –
Калебендә мәңге алйот нәфес бар!
***
И яшәеш, авыр да син, җиңел дә...
Җиһан, бәлки, фәкать минем күңелдә?
Мин үлүгә юкка чыга җиһан да,
Һәм тузан да калмый Галәм төбендә.

«КУ» 01, 2026

Фото: Шедеврум ии