Мәскәү – алыпсатарлар шәһәре

Базарда... бар да бар,

Әти башы белән әни башы гына юк...

Халык мәкале

Кулдан килгән һәркем сату итә,

Калганнары – сатып алучы;

Базар – илнең арба-тәгәрмәче,

Тормыш йөген тартып баручы!

Бар да сата... хикмәт – кем нәрсәсен:

Малын, тәнен, җанын, оятын...

Хәрбиләре яшерен корал сата,

Сәясәтче – илне, әдип – талантын...

Тулып, бушап... кайнап торган базар –

Көннең кырыс яшәү көрәше;

Кемгә – табыш, бәйрәм,

Кемгә – җан асрау,

Кемгә – кәмит,

Кемгә – күз яше...

Мәскәү куйган монда йөз милләтне,

Сату итә... Тел дә әйләнми...

Миллион татар бүген үзен сата...

Әти-әни башын – жәлләми!

Телен сата, илен-җирен сата,

Бабаларын, үткән шөһрәтен...

Елый алмый сүзсез басып торам –

Бигрәк арзан булган милләтем!

-------------------------

Казан белән Мәскәү арасындагы астрономик вакыт аерымлыгы – 45 минут (автор иск.).

"КУ" 05, 2024

Фото: unsplash