Мөһаҗирләр җыры

Туып-үскән илең бит ул,

Гомер иткән ил бит ул...

Илләреңнән чыгып китү

Бик җиңел түгел бит ул.

Илем, дидем. Җаннар аттым.

Канады канатларым.

Газапларны эчкә йотып,

«Илем», – дип кабатладым.

Илем минем сөюемне

Күңеленә иш итмәде.

Нурларымны күрмәде ул,

Моңымны ишетмәде.

Бар баласы арасында

Иң тугры бала идем.

«Кал!» – диеп әйтмәде илем,

«Кал!» – дисә, кала идем.

«Бер үпкәм, бер әрнүем юк», –

Димим. Бар! – Күңел бит ул...

Туып-үскән илең бит ул,

Үзеңнең илең бит ул...

"КУ" 11, 2019

Фото: pixabay