Көннәрнең үксегән чаклары...

Дөньяның күк йөзе чатнады –

Көннәрнең үксегән чаклары.

Ил күген сөремнәр каплады –

Беркайчан бетмәс күк таплары.

Кайдадыр очкычлар егылды,
Кайдадыр тимерләр сыгылды.

Кайдадыр йорт-җирләр ишелде,

Кайдадыр гомерләр киселде.

Ятимнәр, үксезләр ишәйде,

Афәтләр, кайгылар ешайды...
...Кайдадыр кемнәрдер шау итте,

Кемнәрдер тормышны яу итте!

Дөньяның күк йөзе чатнады –

Ил-көннең саташкан чаклары.

Кемнәрдер догалар ятлады,

Кемнәрдер сагаеп атлады.

Берәүләр барыр юл тапмады –  

Туп-туры үлемгә атлады.

Берәүләр китте дә... кайтмады,

Аларның ал таңы атмады.

 Йа Хода! Бирсәнә сабырлык!

Йөрәктә – тау кадәр авырлык!
Ил күген сөремнәр каплады –

Һичкайчан бетмәс күк таплары!

Көннәрнең саташкан чаклары...

Күпләрнең адашкан чаклары...

Кемнеңдер байлыгы ишәйде,

Кемнеңдер түбәсе кыйшайды...

Туктатчы бу мәхшәр-афәтне –

Тилертмә халыкны бу хәтле...

Барсын да Син күреп торасың –

Соңгы сүз Синеке, и Раббым!
 

"КУ" 09,2023

Фото: unsplash