Күл

Тамчылардан күл җыела, диләр,

Яшь җыела кайчак еларлык.

Хәсрәт килсә.

Гыйбрәт сөйләсәләр.

Эш эшләсәң

Башны кыярлык.

Тамчылардан күл җыела, диләр.

Чыгармыйм мин яшьне тамчылап.

Төеп-төеп җыям.

Аннан ява,

Битләремне төндә камчылап.

Хәсрәт килә –

Кысып җанга салам.

Күперәдер кара болыттай.

Битләремә таммый бөртек-бөртек.

Актарылып ага юк-юкта.

Ерыла да китә, ерыла да

Күз төпләрем,

Көче бетә дә,

(Яшем, саркып, буа ергандай бу...

Сабыр савытларым ватылгандай...)

Хәсрәтләрем күпкә китә дә.

"КУ" 09, 2022

Фото: unsplash