Җавапсыз калган сораулар

Бар нәрсәнең рәте китте -

Бу дөнья кая бара?

Җиргә иңгән затсызлыктан

Йөрәгем тулы яра.

Якын дус, кайчак туганның

Хөсеттән йөзе кара.

Иманның, деннең кимүе

Йөрәккә сыза яра.

Миллионлаган үксез бала

Хак юлдан чыгып бара.

Аларның язмышы сала

Йөрәккә тирән яра.

Үз милләтен санга сукмый,

Халкым читләшеп бара.

Шуңа җаным сыкравыннан

Йөрәгем тулы яра.

Тормышны җайлап барырга,

Милләтне саклап калырга,

Үксезне юлга салырга,

Мең ярадан арынырга

Кем ярдәм итә ала?

Сораулар җавапсыз кала -

Бу дөнья кая бара?

Әдәп күперләре яна -

Йөрәгем тулы яра.

Фото: Салават Камалетдинов