Иртән

Йортсыз кеше артыннан  хуҗасыз эт «сөйрәлә»...

Күр әле, күр, бертөслеләр!

Башлары иелгән, юынмаган, кырынмаган...

(Эткәме кырынырга, җүләр!)

Төкселәр...

Кеше...

Кулында зур янчык. Туп-тулы. Ни белән?

Кем белгән... Белергә язмасын...  

Эт...

Аксый. Артык ябык...

Ә бит зур янчык туп-тулы... Ни белән?

Этем дә белми...

Белмәсен...

Калмый иярсен... Өмете үлмәсен...

Үзе дә...

Йортлы кеше алдыннан хуҗалы эт йөгерә...

Күр әле, күр, кешесе, абына-сөртенә,

Артыннан чак өлгерә!..

Ычкындыр бавыннан!

Юк!

Кеше... Телефоннан күзен алмый.

Эт... Ирек сулап туялмый.

Икесе дә кызганыч... Үзем дә...

Нигә?

Азапланам зерә,

«Ятмый» заман шигырьгә...
 

"КУ" 08, 2022

Фото: unsplash