Гөнаһсыз

Җиһанның бу соңгы көннәре

Һәм соңгы төннәре? Охшаган.

Ышанмыйм тик. Синең күзләргә.

Бер синең сүзләргә ышанам.

Болытлар артында – гел кояш.

Ул безне иркәли. Юата.

Кемнәрдер кемнедер очрата.

Кемнәрдер кемнедер югалта.

Ут эчә... Һәм кичә тәкъдирен –

Язылган борыннан. Охшаган.

Ышанмыйм тик... Безнең өметкә...

Бер безнең бәхеткә ышанам. 
Һәм тәүге авазын кычкырган

Улларга... Кызларга... – Карусыз.

Дөньяга – чикләрен ачкан һәм

«Яшәгез, – дигән, – бер таныксыз...»

Оҗмахка кадәр без булганмы?

Һәм бармы? Бармы без оҗмахсыз?!

Күземә карыйлар сабыйлар:

Гөнаһсыз... Шулкадәр гөнаһсыз...

Җиһанның бу соңгы көннәре

Һәм соңгы төннәре? Ышанам.

Ышанам... Тик безнең өметтән

УЛ нидер көткәнгә охшаган.
 

"КУ" 12,2023

Фото: unsplash