Гомерләрнең кышкы балкышы

Декабрьнең соңгы минутлары...

Яңа елны көтә кешелек.

Аяк басу белән яңа таңга

Килер төсле бәхет ишелеп.

Һәр ел саен шулай хыялланып,

Өметләнеп яшидер кеше.

Үтеләсе еллар-чакрымнарның

Яхшырагы алдадыр төсле.

Онытыла тормыш ваклыклары,

Матур уйлар тула күңелгә.

Һәм телибез: Ил-көн имин булсын,

Саулык, муллык иңсен һәр өйгә.

Кабатлана ел да шушы халәт –

Гомерләрнең кышкы балкышы.

Кешелекнең зур ышаныч белән

Яңа елга кереп барышы.

"КУ" 12, 2022

Фото: unsplash