Гомер тирәге

Гомер тирәгеме соң бу?

Нигә алайса бик яшь...

Бу бит... бу бит миңа түгел,

Минем улыма тиңдәш.

Чал ирне аңламас һич тә,

Һәм бирә алмас киңәш.

Төс түгел сызлануларга,

Шаулап утыра – көләч!

Сер сөйләргә, мактанырга,

Якланырга юк ярым.

Гомерем тирәге! Синме бу? –

Тыңла алайса зарым.

Тыңла! Йөзеңне каплап һич

Борылма миңа аркан.

Имгәк шикелле кимсенәм,

Сары сагыштай артам.

Ялгыз калдым яр буенда...

Артка юл юк. Алда – су...

Көймәсез, җырсыз һәм атсыз...

Һәм хаксыз! Язмышмы бу?

Тыңлады тирәк... Кабарды,

Күкләргә тиде башы.

Миңа тигән дөньяны да

Каплады ябалдашы.

"КУ" 5 , 2017

Фото: pixabay