Газәл – тост

«Дустыкаең»нан дога бу! Сиңа барсын «тост» сыман...
Бел: «тост» сүзе «тустак»тан ул, ягъни дустан тустаган!
Багышлыйм тулы тустагым, дускаем, ни хәлләрең?
Ә мин һаман үз ур(ы)нымда: китмим гашыйк постыннан!
«Пост» сүзе дә посудан бит... И газиз тамыр-телем!
Буш калдырма син гыйлемнән, чын тарихтан – дустымнан!
Яр ягасында мин гүя, милли сүз дәрьясында:
Кипмәсә бу тирән дәрья, яшәрбез: рух, көч – шуннан!
Менә шундый догам сиңа: мирас тустагым... Аны
Сиңа багышлар өчендер татарда Гаташ туган!
Мирасым – Сүз, изге нигез, кабул итеп ал гына;
Вак(ы)ты җитсә, күперә кымыз, күр, тустаганым тулган!

«КУ» 03, 2026

Фото: Шедеврум ии