Фәнир бабай утары

Фәнир бабай утары дип, керде алан күңелгә,
Монда аның, утар булып, хыяллары үрелгән.
...Бер утар гына түгел бу,
бу – табигать кочагы.
Җәйге урман. Җиләкләрнең
учка сикергән чагы!
Дөнья яме бер аланда, урман каюлы алан,
Чут та чут кошлар сайравы аланны чолгап алган.
Аллы-гөлле күбәләкләр, аллы-гөлле чәчкәләр,
«Күбәләк» көе күңелдә, кулда – тулы касәләр.

Касәләрдән ташып тора җан рәхәте – чын кымыз,
Әйдә, дустым, тарт тальяның, син бит көйгә дә хирыс!
Бал кортлары безелдәве дәрт өсти күңелләргә,
Кәрәзле балы абзыйның ягыла шигырьләргә.
Балның төсе бер үк – алтын, әмма тәме! Тәм үзгә!
Кояш нурын тутыралар бал кортлары кәрәзгә!
Яшел урман, балыклы күл, гөлләрнең кәләш чагы...
Бу – аланга әверелгән Фәнир бабай кочагы...

"КУ" 03, 2021

Фото: pixabay